|
Cinque Terre

Sensibilizasaun Policiamentu Kumunitariu: Policia ba Campus

Sexta-Feira (18/09/2020): Faculdade Enjeñaria Siensia no Teknolojia—UNTL hala’o workshop ho Tema “Sensibilizasaun Policiamentu Komunitariu” iha salaun Auditoriu FECT-UNTL iha kampus Hera. Iha workshop refere, orador nain tolu mai husi Inspetor Komandu Policia Municipiu Dili nian husi diresaun tolu mak hanesan Policiamentu Komunitariu, Policia Transitu no Policia Servisu Investigasaun Kriminal (SIK). Iha sessaun abertura, Magnifku Reitor ne’ebé representa husi Pro-Reitor Sr. Leonel da S. G. Madeira, M.Eng aprecia ba programa Komandu Policia Municipiu Dili nian atu sensibiliza kna’ar policia nian ba iha komunidade Unirversitáriu, liu-liu estudantes FECT-UNTL. Pro-Reitor ne’e husu ba participante hot-hotu atu tuir workshop nee ho diak, no sai parsería Policia nian atu kria páz no estabilidade hodi kontribui ba dezenvolvimentu nacional. Iha sessaun apresentasaun, Orador nain tolu partilha informasaun kona ba kna’ar PNTL nian ho objetivu atu habelar kna’ar Polisia nian ba iha Komunidade Intelektual no kria Servisu hamutuk entre Polísia ho komunidade akademiku hodi prevene krimi no garante paz no estabilidade iha Munisipiu Dili. Atividade “Lori Policia ba Kampus ka ba komunidade” ne’e ho objetivu principal mak atu dessemina informasaun hot-hotu ne’ebé kontribui ba papel PNTL nian mak hanesan servidor, protetor no implementador lei no orden.

Orador primeiru mak Inspetor Policia Sr. Daniel Da Costa Freitas, ne’ebé koalia kona ba Policiamentu Komunitariu. Inspetor Daniel sublina katak definisaun Policiamentu Komunitariu mak hanesan Servisu Implementasaun lei ho sasukat prevensaun, rezolve problema, involvimentu komunidade no parsería entre polísia ho komunidade. Orador segundu mak Inspetor Policia Sr. Mariano Soares ne’ebé koalia kona ba kna’ar policia ba iha servisu investigasaun kriminal, liu-liu partilha informasaun kona ba prosidimentu legal ba processu investigasaun nian. Parte ikus husi sessaun apresentasaun, Orador datolu Inspetor Policia Sr. Domingos Sarmentu Gama, M.H. ne’ebé apresenta servisu policia transitu nian. Orador ne’e aprenseta informasaun importante sira kona ba regras sinais tranzitu, sansaun ba sira ne’ebé la kumpre regras transit nian no sensibiliza ba audencia hotu atu “Prevene dahuluk, du ke sai Vítima”.

Iha parte sessaun husu no hatan, audencia sira antusiamu tebes atu husu kona ba imparsialidade no profesionalidade servisu policia nian iha terreno. Iha mos pergunta balun kestiona kona ba linha koordenasaun no sepasarasaun poderes entre policia servisu investigasaun criminal (PNTL—SIK) no Policia Sientífika Investigasaun Kriminal (PSIK). Diskusaun Lao ho diak, inspetores nain tolu hatan pergunta sira hotu ho diak no klaru. 

Iha parte ikus, workshop ida ne’e ensera husi Dekanu FECT Dr.Eng. Ruben Jerónimo Freitas. Iha dekanu nia intervensaun, nia subliha liafuan balun husi oradores sira katak “Ita presiza respeita nafatin Policia, maibe lalika tauk Policia, Diak liu ita tauk mak Lei”. Dekanu FECT mos apresia tebes ba programa PNTL Municipiu Dili nian ho naran “Polica ba Campus”, no husu komunidade FECT hotu atu sai parseria policia nian hodi hakman knar policia nian iha terreno. Ikus liu, Dekanu mos husu ba PNTL Dili nian atu partilha nafatin informasaun importante sira ne’e ba estudantes no joven sira, liu-liu konvida PNTL atu partilha informasaun sira ne’e ba estudante foun sira iha periodu orientasaun akademiku ba kada anu letivu. Workshop ba loron sorin ne’e taka no distribuisaun brosura PNTL Dili nian, no foto hamutuk.    

NB: Photo Source foti husi Pagina FB UNTL

Mapa Local FECT



Pagina Facebook


Visitores


Flag Counter

Ba Leten